У Глыбокім прайшоў раённы этап рэспубліканскага конкурсу “Сям’я года”

Удзел у ім прынялі  шматдзетныя сем’і  глыбачан Аляксандра і Юліі Лаўрыновічаў,  Дзмітрыя і Алёны Шаршунс,  Аляксандра і Алены Пашкевічаў,  Дзмітрыя і Марыны Панцялеяў,  Віктара і Елізаветы Ромель і сям’я  Віктара і Наталлі Сіняўскіх з вёскі Мацюкова.

Канкурсанты разам з дзецьмі рыхтавалі дамашняе заданне і прадстаўлялі  візітку сям’і пад назвай “Радавод”.  У другой намінацыі  “Гісторыя маёй сям’і ў гісторыі майго краю”  таты, мамы і іх дзеці расказвалі, што карыснага  яны робяць для росквіту сваёй маленькай радзімы,  які асабісты ўклад уносіць кожны з іх  ва ўмацаванне прэстыжу раёна і рэкламаванні яго дасягненняў.

Падводзячы вынікі конкурсу, старшыня раённага Савета дэпутаў  Вера Цяліца адзначыла, што сёння кожная сям’я – пераможца.

— Вы здолелі пераканаць прысутных, наколькі ўсе таленавітыя, дружныя, крэатыўныя, вясёлыя, шчаслівыя і  расказалі пра гэта з раённай сцэны, — сказала Вера Міхайлаўна і  ўручыла  ўдзельнікам кветкі, каштоўныя падарункі, сертыфікаты  і салодкія прызы.

Самай творчай прызнана сям’я Віктара і Наталлі Сіняўскіх,  крэатыўнай – сям’я Аляксандра і Алены Пашкевічаў,  самай дружнай –  сям’я Дзмітрыя і Марыны Панцялеяў.

Трэцяе месца ў конкурсе заваявала  сям’я  Віктара  і Елізаветы Ромель, другое – Аляксандра і Юліі  Лаўрыновічаў, першае — сям’я Дзмітрыя і Алёны Шаршунс.

Каштоўныя падарункі, сертыфікаты, кветкі  прадстаўлены раённым выканаўчым камітэтам, раённым аб’яднаннем прафсаюзаў, грамадскімі раённымі арганізацыямі “Беларускі Саюз жанчын”, “Белая Русь” і “БРСМ”.

Печать