Нядзельны рынак у Глыбокім (фотарэпартаж)

На Глыбоччыне жывуць працавітыя ініцыятыўныя людзі, якія скарыстоўваюць любую магчымасць для папаўнення сямейнага бюджэту.

Адны  пякуць дамашні хлеб на заквасе па даўнейшым рэцэпце, другія прадаюць мёд са сваёй пасекі, трэція парупіліся і ўжо  гандлююць  свежай ранняй бульбачкай. Нехта вырасціў капусту, хтосьць  — агуркі і памідоры. Няўрымслівыя гаспадыні прынеслі на рынак садовую маліну, а некаторыя  пабывалі ў лесе, назбіралі пазёмак і чарніц. У двух месцах гандлявалі клубніцамі: свойскімі, вырашчанымі на Глыбоччыне, і прывезенымі з суседняга Докшыцкага раёна. Гандаль ішоў: пакупнікі з пакетамі, слоікамі, вёдрамі закуплялі тавар.

Глыбачанка  Зіна, якая вучыць дзвюх дачок, падзарабляе ў сезон на ягадах, каб аплаціць іхнюю вучобу. У буднія дні працуе, а ў выхадныя збірае чарніцы.  Рэгіна Дзям’янчык на невялікм прысядзібным участку ў горадзе вырошчвае ягады, якія прадае з пачатку лета і да позняй восені. Кажа, што да пенсіі атрымліваецца нядрэннай прыбаўка.

Леаніда Краснадубская з Шуневіч  прыехала на рынак са сваімі клубніцамі і малінамі. Яе “суседка” па гандлёвым радзе  прапануе першыя лісічкі па 8 рублёў за  два літры. Жанчына кажа, што раней у Глыбокім прымалі і ягады, і грыбы, а цяпер здаць сабранае праблематычна. Прыватныя закупшчыкі ёсць, але яны даюць капейкі, а праца нялёгкая: і месцы трэба ведаць, дзе што расце, і дабрацца, і ў лесе на жары з камарамі выцерпіць  паўдня.

Уладзімір і Лія прадаюць прадукцыю, вырашчаную ў Мамаях на бацькоўскім агародзе. Раней на сотках шчыравалі бацькі, цяпер – яны самі. Капуста, цыбуля, бульба – прадукцыя свежая і якасная, а таму доўга не залежваецца. У мужа і жонкі ёсць пастанныя пакупнікі, якія давяраюць якасці вырашчанай прадукцыі ім якіх задавальняе цана.

На пяці гектарах зямлі сее зерне і садзіць раннюю бульбу на продаж Ігнацій Піліпёнак з Мацюкова. Яго цэннік — ад дробнай да той, з якой і дранікаў надзярэш — ад рубля да 2 рублёў 80 капеек.

У ліпені “з’ехала” цана на клубніцы: за кілаграм свойскіх  просяць па 3 рублі 50 капеек. Яе па такой цане купляюць вёдрамі: хто – на кампот, хто – на варэнне.

Печать