2.6700 
2.8600 
3.8500 
Загрузка...Цёплая. Восеньская. Жыццёвая. У Глыбоцкім цэнтры традыцыйнай культуры і народнай творчасці новая выстава. Яе аўтар – мастак з суседняй Шаркаўшчыны Віктар Крук. З яго карцінамі глыбачане ўжо знаёміліся, і не аднойчы, праўда, толькі на зборных выставах. А цяпер Віктар Фёдаравіч раскрывае сваю душу, паказвае свае думкі і ўражанні праз персанальную выставу “Спатканні на жыццёвым шляху”.
–У 4 гады намаляваў свой першыпартрэт, у 7 гадоў пачаў пісаць алейнымі фарбамі – таму, дзе вучыцца, пытанняў не было. Ведаў, што будзе мастаком, – расказвае яго вучаніца ў мінулым, а цяпер кіраўнік народнага клуба майстроў “Крыніца” Святлана Кавальчук, у якой Віктар Фёдаравіч выкладаў чарчэнне. – Такімі і павінны быць настаўнікі. Ён любіць свой прадмет, і прывівае любоў да яго сваім вучням. Калі робіць заўвагу, то яна здаецца кампліментам.
Выпускнік мастацка-графічнага факультэта Віцебскага педагагічнага інстытута (з Чырвоным дыпломам) усё жыццё прысвяціў настаўніцтву. У мінулым годзе Віктару Фёдаравічу споўнілася 70 гадоў, але ён верны сваёй педагагічнай справе. З 1992 года і па сённяшні дзень працуе выкладчыкам мастацкага аддзялення Шаркаўшчынскай дзіцячай школы мастацтваў.
Вучыць мастацтву і сам на сваіх карцінах з ім знаёміць.
– Віктар Фёдаравіч стараецца на палотнах пісаць партрэты нашых вядомых землякоў, – расказвае Святлана Аляксандраўна. – У нашай экспазіцыі, паглядзіце, і Янка Купала з Паўлінай Мядзёлкай, Васіль Быкаў, Ян Баршчэўскі, Іван Хруцкі, Рыгор Барадулін, партрэты сяброў-мастакоў Віктара Крука… На карцінах-пейзажах – уражанні мастака ад спатканняў з беларускімі краявідамі на Глыбоччыне, Ушаччыне, Гродзеншчыне, Лепельшчыне, Расоншчыне, Полаччыне.
І між іншым, нагэтай выставе з’яўляецца адчуванне, быццам ведаеш і мастака, і яго работы…
– Карціны падарожнічаюць з выставы на выставу, бо некаторыя з іх Віктар Фёдаравіч лічыць знакавымі, як напрыклад, “Драздовіч”, “Бацькаўшчына. Вытокі”, “Васіль Быкаў”, – тлумачыць Святлана Кавальчук. – У іх ліку, несумненна, будзе адна з апошніх графічных работ “Насустрач”. Мастак хацеў адлюстраваць Апостала Пятра, але атрымаўся збіральны вобраз: чалавек выбірае свой шлях і ідзе, не зважаючы на цяжкасці, падае, падымаецца, сумняваецца, але, ўзняўшы галаву, ідзе насустрач будучыні, светлай, чаканай.
Жадаеце і вы пазнаёміцца з творчасцю цікавага чалавека? Члена Беларускага Саюза мастакоў, лаўрэата звання “Чалавек года Віцебшчыны-2014”, у 2019 годзе ўзнагароджанага медалём “Святога Канстанціна Жданава “, творы якога знаходзяцца ў зборах Нацыянальнага мастацкага музея Рэспублікі Беларусь, Музея Максіма Багдановіча (Мінск), Віцебскага абласнога краязнаўчага музея, прыватных калекцыях Беларусі, Велікабрытаніі, Германіі, ЗША, Польшчы, Расіі, Францыі… Для знаёмства вам прызначаем спатканне ў Глыбоцкім цэнтры традыцыйнай культуры і народнай творчасці.
Печать
