Бісерныя фантазіі Юліі Гаўрыльчык

Яркія кветкавыя кампазіцыі з бісера педагога-арганізатара Ломашаўскай школы Юліі Гаўрыльчык упершыню ўбачыла на выставе дэкаратыўна-прыкладной творчасці, арганізаванай раённым аддзелам па адукацыі у рамках конкурсу “Адукацыя. Творчасць. Талент”. І папрасіла Юлію расказаць пра сваё творчае хобі.

Рукадзеллем яна захапілася ў маленстве, яшчэ да школы. Бабуля Юліі Рэгіна Юзэфаўна цудоўна вышывала гладдзю, вязала кручком, на спіцах. І вучыла ўнучку, якая заўсёды была побач. Юля была церпялівай і ўседлівай – якасці, якія якраз і патрэбны кожнай рукадзельніцы, і хутка пераймала бабуліну навуку. Так і пайшло па жыцці. Як толькі выдавалася вольная хвілінка, Юля рукадзельнічала: вязала кручком сурвэткі, вышывала. А бісерапляценне адкрыла для сябе восем гадоў таму. Можна сказаць, выпадкова.

–Колішні дырэктар мясцовага дома культуры Часлава Генрыхаўна Ваяводка прапанавала паўдзельнічаць у раённай выставе. У мяне было некалькі вышываных работ. Там я і ўбачыла ружу з бісера. Прыехала дадому натхнёная, адразу знайшла ў інтэрнэце майстр-клас і зрабіла такую ж. І так захапілася, што ўжо некалькі гадоў не магу спыніцца. Спачатку паўтарала ўсё, што знаходзіла на форумах, капіравала работы іншых майстроў. Аднойчы натрапіла на онлайн-конкурс, дзе рукадзельніцам прапанавалі зрабіць кветкавую кампазіцыю з бісера па фотаздымку. Так з’явіліся мая першая самастойная работа, – расказвае педагог.

Зараз Юлія валодае многімі тэхнікамі бісерапляцення і стварае з маленькіх каляровых шкляных бусінак сапраўдныя шэдэўры. Аўтарскія ідэі крок за крокам запісвае, фатаграфуе і дзеліцца імі ў сеціве з іншымі рукадзельніцамі. Фотаздымкі сваіх работ дапаўняе легендамі пра тую ці іншую кветку і музыкай, пад якую нарадзілася ідэя.

–Я слухаю рускі рок і ідэі кветкавых кампазіцый узнікаюць менавіта пад песні любімых выканаўцаў. Многіх маіх падпісчыкаў гэта здзіўляе. У мяне часта пытаюцца, як пад ТАКУЮ музыку можа нараджацца такая прыгажосць.  Я і сама не ведаю. Рок мяне натхняе, – прызнаецца майстар.

Як натура творчая,  Юлія любіць вучыцца і пастаянна вывучае новыя віды творчасці. Неяк убачыла ў інтэрнэце брошкі з бісера. Вырашыла паспрабаваць. Так у яе бісернай калекцыі з’явіліся жучкі, стракозы, мініяцюрныя птушачкі і рыбкі – вытанчаныя  і такія мілыя. Сама Юлія амаль не носіць упрыгожанні, стварае іх толькі пад настрой і для пэўных выпадкаў. Збіралася, напрыклад, у паездку на мора – зрабіла празрыстую медузу, яркую птушачку і сакавітыя долькі апельсіна. Купілі з сяброўкай білеты на канцэрт любімай групы рок-групы “Кукрыніксы” – вышыла чорнага ворана ў кароне, а пару ластавак – спецыяльна на новае паліто.

–Цяпер у мяне новае захапленне, якое асабліва падабаецца сыну, – вязанне цацак. Ён глядзіць, як я вяжу, і сам зрэдчасу бярэ ў рукі кручок, але пальчыкі пакуль не слухаюцца,  – расказвае Юлія Васільеўна. –  Мужу і старэйшай дачцэ падабаюцца ўсе мае работы, а бабуля ў захапленні ад бісерных кампазіцый. Мы з ёй нібыта памяняліся ролямі. У дзяцінстве мне так прыемна было пазіраць, як пад яе спрытнымі пальцамі расцвітаюць на тканіне васількі, рамонкі, макі. Цяпер бабуля, якой ужо далёка за восемдзесят, любіць назіраць за маёй працай.

Планаў у Юліі Гаўрыльчык шмат. Яна, напрыклад, марыць выпусціць кнігу па бісерапляценню са сваімі майстар-класамі і закончыць курсы фатографаў. Творчыя ідэі па стварэнні бісерных кампазіцый старанна запісвае ў блакнотІ старанна запісвае свае творчыя ідэі па стварэнні бісерных кампазіцый. Яны пакуль на паперы і …чакае натхнення.

Другие новости Глубокого и Глубокского района
читайте в печатной версии районной газеты «Веснік Глыбоччыны»

Печать