Дзесяць новенькіх аўтобусаў МАЗ-241 беларускай вытворчасці ў рамках праграмы абнаўлення рухомага саставу і больш якаснага абслугоўвання пасажыраў перадаў сёлета філіялу “АТП-16” ААТ “Віцебскаблаўтатранс”.
—Аўтобусы беларускай вытворчасці на суму 1 мільён 70 тысяч рублёў куплены за кошт дзяржаўных сродкаў і перададзены глыбоцкаму прадпрыемству на бязвыплатнай аснове. Аўтобусы на 25 месцаў, камфортныя і надзейныя. Яны ўжо працуюць на гарадскіх і прыгарадных маршрутах. За рулём гэтых аўтобусаў — вадзіцелі-прафесіяналы, ветэраны аўтатранспартнага прадпрыемства Браніслаў Мурзіч, Валерый Арэхва, Валерый Габранскі, Васіль Кулашка, — сказаў дырэктар філіяла “АТП-16” Уладзімір Пачопка. – Спадзяёмся, што пасажыры ацэняць гэты клопат дзяржавы пра чалавека, будуць беражлівымі і акуратнымі — тады ў салонах будзе чыста і ўтульна.