Для кожнага чалавека, які доўгі час добрасумленна служыў грамадству, а затым выйшаў на заслужаны адпачынак, вельмі важна ведаць, што пра яго памятаюць у калектыве.
У канцы верасня людзі ў пагонах па ўсёй рэспубліцы прымалі актыўны ўдзел у акцыі “Не забыты ў сваім калектыве”, якая была прымеркавана да Дня пажылых людзей. Яны дапамагалі ветэранам Міністэрства ўнутраных спраў убіраць ураджай з прысядзібных участкаў, нарыхтоўвалі і прывозілі паліва на зіму, аказвалі неабходныя рамонтныя паслугі дамоў і надворных прыбудоў.
Не засталіся ў баку ад добрых спраў і супрацоўнікі нашага аддзела міліцыі. Напярэдадні гэтай даты мы дапамаглі глыбачанцы, пенсіянерцы МУС Ніне Іванаўне Рубніковіч сустрэць зіму з неабходным запасам гародніны. За кошт сродкаў афіцэрскага сходу мы закупілі ўсё неабходнае: бульбу, чырвоныя бурачкі, моркву, капусту і адвезлі на дом Ніне Іванаўне. Мы з начальнікам райаддзела, палкоўнікам міліцыі Віктарам Васюковічам асабіста суправаджалі груз і перадалі яго гаспадыні. Прыемна было бачыць радасць жанчыны, якой мы дапамаглі вырашыць адно з яе гаспадарчых пытанняў.
