Чыстыя і шырокія вуліцы, утульныя паркі і скверы, па-сучаснаму абсталяваныя месцы для адпачынку, багата зеляніны і кветак – такім, напэўна, кожны з нас хацеў бы бачыць свой горад. Але каб ён такім стаў, трэба добра папрацаваць. Сёння кіраўніцтва райвыканкама прыкладае вялікія намаганні, каб наш горад і раён прыгажэлі. Свой уклад у агульную справу добраўпарадкавання ўносяць работнікі жыллёва-камунальнай гаспадаркі, калектывы прадпрыемстваў і арганізацый горада і раёна, школьнікі, нераўнадушныя гараджане. Моладзь раёна таксама стараецца не заставацца ўбаку.

Вясной бягучага года пры райкаме ГА “БРСМ” быў створаны валанцёрскі атрад працоўнай моладзі “Твой выбар”. Сакратары і актывісты пярвічных арганізацый аб’ядналіся, каб разам папрацаваць на карысць Глыбоччыны, зрабіць наш горад яшчэ больш чыстым і светлым. За шэсць месяцаў бягучага года члены валанцёрскага атрада  былі ініцыятарамі і падтрымалі цэлы шэраг працоўных і экалагічных акцый. І хоць у спісе пастаянных членаў атрада ўсяго 19 чалавек, на дапамогу валанцёрам добраахвотна прыйшлі больш за 400 маладых людзей. І добрых спраў хапіла на ўсіх!
Менавіта сіламі моладзі ў Глыбокім закладзены парк Маладзёжны, Алея Памяці, пасаджана каштанавая алея, наведзены парадак на набярэжнай возера Бяглец і возера Кагальнае, добраўпарадкавана тэрыторыя культурна-дэндралагічнага комплекса ў вёсцы Мосар, ліквідавана 5 несанкцыянаваных звалак. У рамках акцыі “Моладзь. Традыцыі. Будучыня” ў парадак прыведзены памятныя месцы і воінскія пахаванні. Дзякуючы добрасумленнай працы глыбоцкіх валанцёраў, праз 10-15 гадоў наш горад стане яшчэ больш зялёным. Закрасуюць у поўную сілу 1200 пасаджаных соснаў, 150 каштанаў, 150 кустоў жывой агароджы. 
Справаздачу аб сваёй рабоце валанцёры прадставілі на традыцыйны экалагічны конкурс “Моладзь – за чысціню гарадоў і сёл”, які штогод праводзіцца па ініцыятыве ГА “БРСМ”. У выніку – валанцёрскі атрад працоўнай моладзі “Твой выбар” прызнаны лепшым як у вобласці, так і ў рэспубліцы. А ў намінацыі “Лепшы валанцёр студэнцкай моладзі” другое месца ў рэспубліцы заняла глыбачанка Наталля Юргель – камандзір валанцёрскага атрада “Профі” Глыбоцкага дзяржпрафліцэя. 
Наталля СУСЛА.