Жыццё выпрабоўвала яе сіроцтвам, дзіцячым домам, голадам і суровымі пракурорскімі буднямі. Пераканаўшыся ў яе цярплівасці, настойлівасці, працавітасці, крыштальнай сумленнасці і не жаночай цягавітасці, узамен аднятай бацькоўскай любові дарыла любоў дзяцей, узнагароджвала сярэбраным медалём і ганаровым званнем «Заслужаны юрыст Беларускай ССР». Следчы Глыбоцкай пракуратуры, якая аддала любімай прафесіі трэць стагоддзя і стала заснавальніцай працоўнай дынастыі, Фаіна Андрэеўна Шаева не пакінула ў спадчыну дзецям і ўнукам ні шыкоўных асабнякоў, ні шыкоўных аўтамабіляў, ні права карыстацца матэрыяльнымі льготамі і выгодамі. Яна перадала ім толькі справу ўсяго свайго жыцця, прафесійныя навыкі і найвышэйшую пробу на чалавечнасць.

Адна справа наводзіць парадак дома, другая – гаспадарыць у горадзе: тут і тэрытарыяльны маштаб не дзесяткамі метраў квадратных вымяраецца, і колькасць спраў на пальцах не пералічыш, ды і ўзровень адказнасці вышэй за сямейны. Глыбачане хочуць жыць камфортна, а таму трэба быць спраўным і рупным, каб усюды паспець, дасведчаным і граматным, каб выконваць даручэнні прафесійна, адказным і кемлівым, каб кожная работа была выканана якасна і ў тэрмін.