«Вішнёвы» баян застаўся ў Глыбокім

1 Звезда2 Звезды3 Звезды4 Звезды5 Звезд (4 оценок, среднее: 4,00 из 5)
Загрузка...

Раней без гармоніка, ну і, вядома ж, без добрага гарманіста, не абыходзілася ніводнае свята – ні ў горадзе, ні, тым больш, у вёсцы. На жаль, сёння гэты музычны інструмент неапраўдана забыты: не так часта пачуеш яго “голас” на вяселлях, провадах у армію, іншых сямейных мерапрыемствах. Але “Вішнёвы фестываль” – добрае выключэнне. Кожны год падчас свята на глыбоцкай сцэне гучыць гармонік.

Міжнародны конкурс гарманістаў, акардэаністаў і баяністаў “Вішнёвыя найгрышы” ладзіцца ў рамках фестывалю шэсць гадоў запар і традыцыйна збірае на цэнтральнай плошчы шмат гледачоў, самых шчырых прыхільнікаў гэтага інструмента, для якіх гармонік – гэта прыемныя ўспаміны пра мінулае, пра маладосць. А ўдзельнічаюць у конкурсе як нашы, мясцовыя гарманісты, так і музыкі з розных рэгіёнаў Беларусі, а таксама з Латвіі, Расіі, Грузіі і Арменіі. Сярод удзельнікаў – і прафесійныя музыканты, і музыканты-самавучкі.

Іван Чайка, Аляксандр Мурзін, Валерый Шаўчук, Валянціна Пятроўская.

Вось і сёлета ў імправізаванай фестывальна-канцэртнай зале быў аншлаг. Гледачы з нецярпеннем чакалі знаёмства з канкурсантамі, якіх у гэтым годзе было дзевяць. Конкурс праводзіўся ў двух узроставых катэгорыях, і на сцэну разам з вопытнымі гарманістамі выйшлі таленавітыя баяністы і акардэаністы, вучні Браслаўскай, Глыбоцкай і Докшыцкай дзіцячых школ мастацтваў. А іх ігру ацэньвала прафесійнае журы на чале з начальнікам упраўлення ўстаноў культуры і народнай творчасці Міністэрства культуры Рэспублікі Беларусь Ірынай Карповіч.

Гучнымі апладысментамі віталі ўсе прысутныя аркестр баяністаў Глыбоцкай дзіцячай школы мастацтваў пад кіраўніцтвам Таццяны Кудрашовай, які адкрыў конкурсную праграму. А затым вядучыя вынеслі на святочную сцэну гранпры – новенькі “вішнёвы” баян – дарэчы, падарунак прыватнага прадпрымальніка, дырэктара ААТ “Глыбоцкі мэблевы цэх” Сяргея Забалоцкага, які выступаў спонсарам музычнага конкурсу “Вішнёвыя найгрышы”.

А за «кулісамі» ўжо хваляваліся канкурсанты. Пазнаёмімся з імі. Каб парадаваць глыбачан сваёй творчасцю ў Глыбокае прыехалі члены гільдзіі гарманістаў Беларусі Іван Чайка з Брэста і Валерый Шаўчук з Кобрына Брэсцкай вобласці. Іван Чайка — вулічны музыкант, які не толькі іграе віртуозна, але і выдатна спявае, і, між іншым, калекцыяніруе гармонікі. Валерый Шаўчук узяў у рукі гармонік у дзяцінстве і з таго часу з інструментам не растаецца. У Валерыя таксама ёсць калекцыя гармонікаў, многія з якіх ён сам адрэстаўраваў. Землякі пастаянна ўдзельнічаюць у конкурсах, фестывалях, што праводзяцца як у Беларусі, так і за межамі нашай краіны, граюць на святах і мерапрыемствах у сваім і суседніх раёнах. У свой час Валерыю давялося граць на гармоніку на сцэнічных пляцоўках многіх еўрапейскіх краін і нават у Аб’яднаных Арабскіх Эміратах.

– І паўсюль нас, гарманістаў, вельмі добра сустракалі! – гаворыць Валерый. – У Беларусі, на маю думку, пасля некаторага заняпаду гармонік зноў набірае папулярнасць. І гэта нас, гарманістаў, вельмі радуе.

Аляксандр Мурзін (Наваполацк).

З суседняга Наваполацка на конкурс у Глыбокае прыехаў член гільдзіі гарманістаў Расіі, ураджэнец Тулы Аляксандр Мурзін. У Аляксандра, як і ў яго старэйшых гарманістаў-калег, няма спецыяльнай адукацыі, але ён выдатна падбірае мелодыі на слых. Напрыканцы 90-х гадоў Аляксандр са сваімі тульскімі сябрамі бралі удзел у святкаванні 850-годдзя Масквы, дзе акампаніравалі Людміле Зыкінай, а таксама здымаліся ў папулярнай тэлеперадачы «Играй, гармонь!».

Вырашыў паўдзельнічаць у конкурсе музыкант і кампазітар, лаўрэат міжнародных музычных конкурсаў, загадчык Палаца культуры энергетыкаў горада Новалукомля Сяргей Семянькоў.

Сяргей Семянькоў (г. Новалукомль).

Не за “вішнёвым” баянам, а, што называецца, душу адвесці прыехаў на конкурс гарманіст Міхаіл Харужонак з вёскі Ляхаўшчына Пастаўскага раёна. Міхаіл Міхайлавіч расказаў, што яго бацька граў на балалайцы, а ён з дзяцінства, колькі сябе памятае, на гармоніку. Нотную грамату яму “крыху паказалі” падчас службы ў арміі, дзе іграў у духавым аркестры.

Міхаіл Харужонак (Пастаўскі раён).

– Два разы быў у вас на фестывалі, прыязджаў менавіта дзеля конкурсу баяністаў, паслухаць, як людзі іграюць. А сёлета вырашыў і сам паўдзельнічаць, бо без музыкі вельмі сумую, а іграць цяпер няма дзе, хіба дома, для самога сябе, – расказаў мужчына.

А цяпер уявіце, як няпроста было самым юным удзельнікам конкурсу Дар’і Загорскай з Докшыц, Уладзіміру Чагарыну і Ганне Брылевіч з Браслава, а таксама глыбачанцы Паліне Сіняўскай канкурыраваць з такімі вопытнымі музыкамі. Аднак моладзь не спасавала!

Канцэрт доўжыўся амаль гадзіну. Гледачы былі ў захапленні. Многім, бачна было, хацелася кінуцца ў скокі. Кожнага канкурсанта праводзілі са сцэны гучнымі апладысментамі і воклічамі “Брава!”.

Пасля непрацяглага перапынку, які быў запоўнены песнямі ў выкананні глыбоцкіх артыстаў, на сцэну для ўручэння ўзнагарод выйшла старшыня журы Ірына Карповіч. Па рашэнні журы, дыпломы ўдзельнікаў атрымалі ўсе, а лаўрэатамі конкурсу сталі ў першай узроставай катэгорыі Дар’я Загорская (Дыплом 3 ступені), Ганна Брылевіч (Дыплом 2 ступені) і Уладзімір Чагарын (Дыплом 1 ступені). У другой узроставай катэгорыі – Аляксандр Мурзін (Дыплом 3 ступені), Валерый Шаўчук (Дыплом 2 ступені) і Сяргей Семянькоў (Дыплом 1 ступені).

Паліну Сіняўскую (г. Глыбокае) віншуе Ірына Карповіч.

А гран-пры конкурсу гарманістаў , акардэаністаў і баяністаў “Вішнёвыя найгрышы” выйграла вучаніца Глыбоцкай дзіцячай школы мастацтваў Паліна Сіняўская. А гэта значыць, што “вішнёвы” баян зноў (трэці раз!) застаўся ў Глыбокім!

Удзельнікі конкурсу.

Вам может понравиться



Веснік Глыбоччыны - Новости г. Глубокое и Глубокского района,
© Авторское право принадлежит учреждению "Редакция районной газеты "Веснік Глыбоччыны" Глубокского района , 2021г.
Гиперссылка на источник обязательна. Условия использования материалов.


Рейтинг@Mail.ru
Яндекс.Метрика Рейтинг@Mail.ru