У чацвер, 17 кастрычніка, у гарадскім Доме культуры прайшло свята, прысвечанае Дню работнікаў культуры. Галоўнымі героямі свята сталі яркія прадстаўнікі культурнай  сферы Глыбоччыны,  а самым лепшым работнікам клубных устаноў, бібліятэк, музея, творчых калектываў уручаны ўзнагароды і кветкі.

Удзельнікаў свята цёпла прывітаў старшыня раённага выканаўчага камітэта Аляксандр Шубскі, падкрэсліўшы, што ў галіне культуры могуць працаваць толькі таленавітыя людзі.

—Вы дорыце людзям радасць, ствараеце ім настрой, і ад райвыканкама і ад усіх нас віншую вас з гэтым цудоўным святам, — сказаў Аляксандр Мікалаевіч. – Будзьце шчаслівымі, няхай у вашай душы і над вамі заўжды будзе толькі сонечная пагода. Нясіце ў жыццё славянскія звычаі, развівайце народныя традыцыі, песняй і музыкай натхняйце людзей на стваральную працу.

Аляксандр Шубскі ўзнагародзіў лепшых  прадстаўнікоў культуры раёна дыпломамі, граматамі і падзякамі старшыні райвыканкама.

 Узнагароды раённага Савета дэпутатаў уручыла старшыня раённага Савета  дэпутатаў Галіна Унуковіч.

Многія ўдзельнікі свята атрымалі граматы і падзякі  аддзела ідэалагічнай работы, культуры і па справах моладзі райвыканкама – узнагароды ўручыла начальнік аддзела Людміла Карніловіч.

Музычныя падарункі дарылі прысутным у зале  ўзорны ансамбль барабаншчыц “Віват”  гарадскога Дома культуры, артысты Глыбоцкай дзіцячай школы мастацтваў і народнай эстраднай студыі “Архіў”.

Прыемным сюрпрызам для ўдзельнікаў свята стала выступленне вакальнай групы ансамбля танца, музыкі і песні “Талака” Віцебскай абласной філармоніі.

Падрабязней – у адным з бліжэйшых нумароў “ВГ”.

Печать